देउवाले घरबाटै पार्टी सञ्चालन गरिरहनु भएको छ : गगन थापा
काठमाडौँ — नेपाली कांग्रेसका महामन्त्री गगन थापाले पार्टीको महाधिवेशन निर्धारित समयमै सम्पन्न गर्न वडा, क्षेत्र हुँदै सिधै केन्द्रीय महाधिवेशन गर्ने कार्यतालिका प्रस्ताव गरेका छन्। समय अभावका कारण अन्य अधिवेशनहरू महाधिवेशनपछि गर्न सकिने उनको सुझाव छ।
बुधबार सानेपास्थित पार्टी कार्यालयमा बसेको केन्द्रीय कार्यसमिति बैठकमा थापाले क्रियाशील सदस्यतासम्बन्धी विवाद समाधानका लागि सर्वाधिकार सम्पन्न प्रतिनिधि फिल्डमै खटाइनुपर्ने धारणा राखे। बैठकपछि उनले पुस २१ गते वडा, २३ गते क्षेत्र र २६ गते केन्द्रीय महाधिवेशन गर्न सकिने प्रस्ताव अघि सारेको जानकारी दिए।
प्रस्तावित कार्यतालिकामा सहमति नजुटे महाधिवेशनमै असर पर्न सक्ने चेतावनी दिँदै थापाले विकल्प अस्वीकार भए विशेष महाधिवेशन रोक्न नसकिने स्पष्ट पारे। साथै, उनले पार्टी सभापति शेरबहादुर देउवाले औपचारिक मात्र कार्यवाहक जिम्मेवारी दिएको र बैठकमा सहभागी नहुँदै निवासबाट पार्टी सञ्चालन गरेको टिप्पणी गरे। पार्टीको हितप्रति सभापतिको भूमिकामा अझ बढी जिम्मेवारी देखिनुपर्ने उनको भनाइ थियो।
यसबीच कांग्रेस प्रवक्ता प्रकाशशरण महतले थापाको प्रस्तावमाथि छलफल सुरु भइसकेको जानकारी दिए। कार्यतालिका परिवर्तनले महाधिवेशन प्रभावित नहुने गरी निर्णय हुनुपर्नेमा अन्य सदस्यहरूको जोड रहेको उनले बताए। साथै, संघको समानुपातिकतर्फ उम्मेदवार बन्न चाहेका १९ नेताको नाम प्रदेशबाट हटाइएको निर्णय पनि बैठकले गरेको उनले जानकारी दिए।
बैठकमा महामन्त्री तथा सहमहामन्त्रीसहित वरिष्ठ नेताहरूले आ–आफ्ना धारणा राखेका थिए। कांग्रेसले केन्द्रीय कार्यसमिति बैठक बिहीबार दिउँसो पुनः बस्ने जनाएको छ।
