भारतको नोयडामा मजदुरको तलब वृद्धि मागसहितको प्रदर्शन हिंसात्मक बन्दै
भारतको उत्तर प्रदेश अन्तर्गत नोयडाका औद्योगिक क्षेत्रहरू—फेज २, सेक्टर ६० लगायत क्षेत्रमा सोमबार मजदुरहरूको तलब वृद्धि मागसहितको प्रदर्शन हिंसात्मक बनेको छ। प्रदर्शनकारीहरूले सवारी साधनमा आगजनी, ढुंगामुढा र तोडफोड गरेपछि स्थिति तनावपूर्ण बनेको हो।
प्रदर्शनका कारण दिल्ली–नोयडा सीमा क्षेत्रमा यातायात पूर्ण रूपमा प्रभावित भयो। बिहानको व्यस्त समयमा हजारौं यात्रु अलपत्र परे भने सडकहरूमा सवारी साधनको लामो जाम देखिएको थियो। केही समूहले राष्ट्रिय राजमार्ग ९ समेत अवरुद्ध गरेका थिए।
अधिकारीहरूका अनुसार मजदुरहरू लामो समयदेखि तलब पुनरावलोकनको माग गर्दै आएका थिए। विभिन्न औद्योगिक एकाइहरूमा सुरु भएको प्रदर्शन अचानक उग्र बनेपछि सुरक्षा चुनौती थपिएको हो।
स्थिति नियन्त्रणमा लिन गौतम बुद्ध नगर कमिश्नरेटले ठूलो संख्यामा प्रहरी परिचालन गरेको छ। वरिष्ठ अधिकारीहरू घटनास्थलमै खटिएर निगरानी गरिरहेका छन् भने आवश्यक परेको ठाउँमा न्यूनतम बल प्रयोग गरिएको प्रहरीले जनाएको छ।
यसैबीच दिल्ली प्रहरीले पनि सीमा क्षेत्रहरूमा सुरक्षा कडा बनाउँदै सवारी साधनहरूको कडाइका साथ जाँच गरिरहेको छ। प्रशासनले सर्वसाधारणलाई अफवाहमा नलाग्न आग्रह गर्दै स्थिति बिस्तारै नियन्त्रणमा आउँदै गरेको जनाएको छ।
