ग्याङस्टर गोल्डी ब्रार एफबीआईको ‘टप १० मोस्ट वान्टेड’ सूचीमा
वासिङ्टन, १४असाेज १४
एक महत्त्वपूर्ण घटनाक्रममा, अमेरिकी सङ्घीय अनुसन्धान ब्युरोले मङ्गलबार ‘गोल्डी ब्रार’का नामले परिचित फरार ग्याङस्टर सतिन्दरजित सिंहलाई आफ्नो ‘सबैभन्दा बढी खोजी गरिएका १० फरार अपराधी’ को सूचीमा समावेश गरेको छ।
साथै, उनको गिरफ्तारीमा मद्दत पुग्ने सूचना दिने व्यक्तिलाई १० लाख अमेरिकी डलरसम्मको पुरस्कार दिने घोषणासमेत गरिएको छ।
एफबीआईद्वारा जारी सूचनाअनुसार, सिंह ‘लरेन्स बिश्नोई सङ्गठित अपराध समूह’को उत्तर अमेरिकी प्रमुखका रूपमा सक्रिय रहेकाले यो सूचीमा परेका हुन्। उक्त समूह अमेरिका र क्यानडामा भएका शृङ्खलाबद्ध हिंस्रक अपराधहरूमा संलग्न रहेको आरोप छ।
एफबीआईले विज्ञप्ति जारी गर्दै सतिन्दरजित सिंहलाई ‘सबैभन्दा बढी खोजी गरिएका १० फरार अपराधी’को सूचीमा राखिएको जनाएको छ। उनीमाथि दक्षिणी क्यालिफोर्निया तथा अमेरिका र क्यानडाभरि विभिन्न हिंसात्मक गतिविधिहरू सञ्चालन गरिरहेको लरेन्स बिश्नोई सङ्गठित अपराध समूहको नेतृत्व गरेको आरोप छ।
एफबीआईका अनुसार उक्त आपराधिक समूह “राजनीतिक तथा धार्मिक व्यक्तित्वहरूको हत्या, गोलीकाण्ड, अपहरण, जबर्जस्ती असुली, कुटपिट तथा लागुऔषध र हतियारको तस्करी” जस्ता गम्भीर अपराधहरूमा सक्रिय रहँदै आएको छ।
अमेरिकी अधिकारीहरूका अनुसार सिंह हाल अमेरिकामै बसोबास गर्दै आएका छन् र उत्तर अमेरिकाभरि उक्त समूहको आपराधिक गतिविधिलाई नियन्त्रण तथा सञ्चालन गर्छन्।
लस एन्जलसस्थित ‘सेन्ट्रल डिस्ट्रिक्ट अफ क्यालिफोर्निया’को अमेरिकी जिल्ला अदालतले सिंहविरुद्ध सङ्घीय पक्राउ पुर्जी जारी गरिसकेको छ। उनीमाथि ‘रिको’ अर्थात सङ्गठित अपराधसम्बन्धी कानुन अन्तर्गत षड्यन्त्र, जबर्जस्ती असुलीमार्फत व्यापारमा अवरोध पुर्याउने प्रयास र लागुऔषध तस्करीको षड्यन्त्र रचिएको गम्भीर आरोप लगाइएको छ।
एफबीआईको ‘वान्टेड बुलेटिन’मा ती फरार अभियुक्तका लागि “गोल्डी ब्रार,” सतिन्दरजित सिंह ब्रार, सतिन्दर जित र सतिन्दर जित सिंह ब्रार जस्ता विभिन्न उपनामहरू उल्लेख गरिएका छन्।
ब्युरोले सार्वजनिक गरेको विवरणअनुसार सिंहको जन्म भारतको पञ्जाबमा भएको हो र उनी पञ्जाबी तथा अङ्ग्रेजी दुवै भाषा बोल्छन्। एफबीआईका अनुसार ती फरार व्यक्तिले क्यालिफोर्नियाका स्याक्रामेन्टो र फ्रेस्नोका साथै क्यानडा, भारत र मेक्सिकोमा समेत आपराधिक सञ्जाल कायम राखेका छन्।
सार्वजनिक सूचनामार्फत एफबीआईले सतिन्दरजित सिंह “अत्यन्तै हतियारधारी, खतरनाक र भाग्न सक्ने जोखिमयुक्त व्यक्ति” भएको चेतावनी दिएको छ।
