टिकटकमा फर्निचरको विज्ञापन, स्क्रिन सेयर गराएर खाताबाट रकम गायब : रौतहटमा चार पक्राउ

सञ्जय मिश्रा
रौतहट, असोज १४

टिकटकमा फर्निचर बिक्रीको आकर्षक विज्ञापन देखाएर मोबाइल बैंकिङको विवरण हात पार्ने र खाताबाट रकम निकाल्ने गरेको आरोपमा रौतहट प्रहरीले थप दुई जनालाई पक्राउ गरेको छ।

थप दुई जना पक्राउ परेसँगै घटनामा पक्राउ पर्नेको संख्या चार पुगेको छ। थप पक्राउ पर्नेमा कटहरिया नगरपालिका–३ बिर्ती प्रस्टोकाका रामप्रवेश साह बनिया र सुबोध माली भगत रहेका छन्। यसअघि प्रहरीले सोही ठाउँका २० वर्षीय सुरजप्रसाद यादव र २२ वर्षीय भोलिन्द्रकुमार यादवलाई पक्राउ गरेको थियो। उनीहरूलाई गत भदौ १६ गते बिर्ती प्रस्टोकाबाट पक्राउ गरी आवश्यक अनुसन्धानका लागि इलाका प्रहरी कार्यालय गरुडा पठाइएको थियो। उनीहरूविरुद्ध भदौ १७ गते अनलाइन ठगीसम्बन्धी मुद्दा दायर गरिएको थियो। पक्राउ परेकाहरूको बयान र अनुसन्धानबाट खुलेका तथ्यका आधारमा थप दुई जनालाई पक्राउ गरिएको इलाका प्रहरी कार्यालय गरुडाका प्रमुख डीएसपी शंकरप्रसाद आचार्यले जानकारी दिएका छन्।

स्क्रिन सेयर गराएर बैंकिङ पासवर्डसम्म पहुँच
प्रहरीका अनुसार गत भदौको दोस्रो साता सिरहाको नवराजपुर गाउँपालिका–३ का ४५ वर्षीय वैद्यनाथकुमार यादवलाई टिकटकमार्फत फर्निचर बिक्री गर्ने भन्दै सम्पर्क गरिएको थियो। फर्निचर खरिदका विषयमा कुराकानी गर्ने क्रममा पीडितलाई मोबाइलको स्क्रिन सेयर गर्न लगाइएको र त्यस क्रममा मोबाइल बैंकिङको पासवर्ड प्राप्त गरिएको प्रहरीको अनुसन्धानबाट खुलेको छ। त्यसपछि पीडितको बैंक खाताबाट ४७ हजार १९८ रुपैयाँ निकालिएको आरोप छ।

खाताबाट रकम निकालिएपछि पीडितले बैंक खातासम्बन्धी विवरणका आधारमा आरोपीको पहिचान गरी भदौ १६ गते इलाका प्रहरी कार्यालय कटहरियामा उजुरी दिएका थिए। उजुरीपछि अनुसन्धान अघि बढाएको प्रहरीले सुरजप्रसाद यादव र भोलिन्द्रकुमार यादवलाई पक्राउ गरेको थियो। उनीहरूको बयान तथा अनुसन्धानबाट प्राप्त सूचनाका आधारमा रामप्रवेश साह बनिया र सुबोध माली भगतसमेत पक्राउ परेका हुन्।
 
नक्कली नागरिकता र राहदानीबाट बैंक खाता
डीएसपी आचार्यका अनुसार पक्राउ परेकाहरूले फर्निचर बिक्रीको बहानामा मात्र नभई अनलाइनमार्फत विभिन्न किसिमका ठगी गर्ने गरेको प्रारम्भिक अनुसन्धानबाट खुलेको छ। उनीहरूले नक्कली नागरिकता र राहदानी बनाएर त्यसैका आधारमा बैंक खाता खोल्ने र ठगीमा प्रयोग गर्ने गरेको समेत अनुसन्धानबाट खुलेको प्रहरीले जनाएको छ। घटनाको प्रकृति हेर्दा यो एउटा व्यक्तिसँग भएको ठगीमा मात्र सीमित नभई थप व्यक्तिहरूको संलग्नता हुनसक्ने प्रहरीको आशंका छ। प्रहरीले पक्राउ परेकाहरूविरुद्ध संगठित अपराधसम्बन्धी कसुरमा समेत थप अनुसन्धान गरिरहेको जनाएको छ।

हाल चारै जना इलाका प्रहरी कार्यालय गरुडाको नियन्त्रणमा छन्। प्रहरीले उनीहरूसँग जोडिएका अन्य व्यक्ति, बैंक खाता, डिजिटल कारोबार तथा ठगीका सम्भावित घटनाबारे अनुसन्धान अघि बढाएको छ। अनुसन्धान पूरा भएपछि टिकटकमा फर्निचर बिक्रीको बहानामा भएको ४७ हजार १९८ रुपैयाँको ठगी पछाडि कति व्यक्ति र कस्तो डिजिटल सञ्जाल सक्रिय थियो भन्ने विषय थप स्पष्ट हुने प्रहरीको भनाइ छ।