क्षतिग्रस्त माथिल्लो तामाकोशी बाट ८८ दिनपछि विद्युत् उत्पादन सुरु
नेपालमा सञ्चालित जलविद्युत आयोजनामध्ये सबैभन्दा ठूलो, ४५६ मेगावाट क्षमताको माथिल्लो तामाकोशी जलविद्युतगृहबाट विद्युत् उत्पादन आंशिक रूपमा सुरु भएको छ। गत असोज ११ र १२ गतेको अविरल वर्षाका कारण क्षतिग्रस्त संरचनाहरुको मर्मतसम्भार पछि ८८ दिनपछि मङ्गलबार बेलुकी ७:४० बजे पुनः विद्युत् उत्पादन सुरु गरिएको हो।
हाल तामाकोशी नदीमा उपलब्ध पानीको बहावलाई पूर्ण रूपमा प्रयोग गरी १२० मेगावाट विद्युत् उत्पादन भइरहेको छ।
असोज ११ गते साँझ ७ बजेदेखि तामाकोशी नदीमा पानीको बहाव उच्च भएपछि केन्द्रबाट विद्युत् उत्पादन बन्द गरिएको थियो। त्यसपछि असोज १२ गतेको पहिरोले बाँधस्थल नजिकै रहेको नियन्त्रण कक्ष भवन, बालुवा थिग्रयाउने पोखरी (डिस्याण्डर), र बाँधबाट डिस्याण्डरसम्म पानी पुर्याउने भूमिगत नहर (कल्भर्ट)मा क्षति पुर्याएको थियो।
मर्मत सम्पन्न भएपछि आयोजनाबाट पुनः राष्ट्रिय प्रसारण प्रणालीमा विद्युत् जोडिएको छ। थप संरचनाहरूको मर्मत कार्य जारी रहेको र पूर्ण क्षमतामा उत्पादन छिट्टै सुरु हुने अपेक्षा गरिएको छ।
