कपिलवस्तुको सुठौली भन्सारबाट ६ महिनामा ४० करोड बढी राजस्व संकलन

कपिलवस्तुको सुठौली भन्सारमा राजस्व संकलनमा उल्लेख्य वृद्धि भएको छ। यशोधरा गाउँपालिकामा अवस्थित यस भन्सार कार्यालयले चालु आर्थिक वर्ष २०८१/८२ को पहिलो ६ महिनामै वार्षिक लक्ष्यको ५० प्रतिशतभन्दा बढी राजस्व संकलन गरेको छ।

साउनदेखि पुससम्मको अवधिमा सुठौली भन्सारले ४० करोड ७८ लाख ६७ हजार रुपैयाँ राजस्व संकलन गरेको छ। यो अवधिमा १०४ प्रतिशत लक्ष्य हासिल गरेको कार्यालयले वार्षिक ८० करोडको लक्ष्यलाई सहजै पार गर्ने देखिएको छ।

भन्सार प्रमुख नारायण गैरेका अनुसार गत आर्थिक वर्ष २०७९/८० को सोही अवधिमा करिब २० करोड रुपैयाँ मात्र राजस्व संकलन भएको थियो। यस वर्ष दोब्बरभन्दा बढी राजस्व संकलन हुनुलाई महत्वपूर्ण उपलब्धि मान्न सकिन्छ।

विशेषगरी मंसिर महिनामा उत्साहजनक राजस्व संकलन भएको थियो। सात करोड २० लाख ४४ हजारको लक्ष्य राखिएकोमा १० करोड ७८ लाख ९४ हजार रुपैयाँ संकलन भएको थियो, जुन मासिक लक्ष्यको झन्डै १५० प्रतिशत हो। पुसमा पनि सात करोड ७० लाख ४ हजारको लक्ष्यमा १० करोड ५२ लाख ४७ हजार संकलन भएको थियो।

अन्य महिनाहरुको राजस्व संकलन विवरण

कात्तिक: लक्ष्य ६ करोड ६० लाख ६ हजार, संकलन ५ करोड ७८ लाख ८१ हजार

असोज: लक्ष्य ५ करोड ८६ लाख ३५ हजार, संकलन ४ करोड ७२ लाख ४३ हजार

भदौ: लक्ष्य ६ करोड ७२ लाख १८ हजार, संकलन ४ करोड ६२ लाख ७१ हजार

साउन: लक्ष्य ६ करोड ८ लाख ५५ हजार, संकलन ४ करोड ३३ लाख ३ हजार

आयात, मूल्य अभिवृद्धि कर, अन्तःशुल्क, कृषि सुधार शुल्क लगायतका शीर्षकमा यो राजस्व संकलन भएको हो। फलफूल, कोइला, धान खरानी, खाद्यान्न, तरकारी लगायतका वस्तुहरुको आयातबाट मुख्य रुपमा राजस्व आएको भन्सार प्रमुख गैरेले जानकारी दिनुभयो।