बाघको सङ्ख्या बढ्दै जाँदा बासस्थानमा ९३ प्रतिशतले गिरावट
नेपालमा बाघको सङ्ख्या वृद्धि भएसँगै बासस्थान विस्तारको आवश्यकता देखिएको छ। हाल निकुञ्ज क्षेत्र, मध्यवर्ती क्षेत्र र अन्य वनहरू बाघको प्राकृतिक वासस्थानका रूपमा रहेका छन्। तर, बाघको सङ्ख्या बढ्दै जाँदा बासस्थानको अभाव गम्भीर समस्या बन्न थालेको छ।
चितवन राष्ट्रिय निकुञ्जले आयोजना गरेको एक अन्तरक्रिया कार्यक्रममा राष्ट्रिय निकुञ्ज तथा वन्यजन्तु संरक्षण विभागका वरिष्ठ इकोलोजिस्ट हरिभद्र आचार्यले बाघका लागि थप बासस्थान आवश्यक रहेको बताएका छन्। उनका अनुसार, पछिल्लो पाँच वर्षमा बाघको सङ्ख्या उल्लेख्य रूपमा वृद्धि भएकाले तिनको सुरक्षित बासस्थान सुनिश्चित गर्नुपर्ने आवश्यकता छ।
आचार्यले हिंस्रक बाघहरूको संरक्षणका लागि खुला चिडियाखाना निर्माण गर्नुपर्ने धारणा राख्दै त्यसलाई आयआर्जनसँग जोड्न सकिने बताए। उनका अनुसार, नेपालमा सन् २००९ मा १२१ रहेको बाघको सङ्ख्या २०२२ मा बढेर ३५५ पुगेको छ। यसअघि सन् २०१३ मा १९८ र सन् २०१८ मा २५३ बाघ गणना गरिएको थियो।
बाघको सङ्ख्या बढ्दै जाँदा यसको बासस्थान भने ९३ प्रतिशत घटेको आचार्यले जानकारी गराए। करिब एक सय वर्षअघि विश्वभर एक लाख हाराहारीमा रहेका बाघ अहिले घटेर मात्र पाँच हजारजति बाँकी रहेको तथ्याङ्क उनले प्रस्तुत गरे। यद्यपि, पछिल्ला वर्षहरूमा संरक्षण प्रयासहरू प्रभावकारी बन्दै गएपछि बाघको सङ्ख्या पुनः वृद्धि हुन थालेको छ।
