लुम्बिनी प्रदेशले रोक्का जग्गा शर्तसहित फुकुवा गर्ने निर्णय
लुम्बिनी, भदौ ९ — लुम्बिनी प्रदेश सरकारले राजधानी क्षेत्रभित्र रोक्का राखिएका निजी जग्गा शर्तसहित फुकुवा गर्ने निर्णय गरेको छ ।
आज बसेको प्रदेश मन्त्रिपरिषद्को बैठकले राप्ती गाउँपालिका, गढवा गाउँपालिका र अर्घाखाँचीको शीतगङ्गा नगरपालिकामा रोक्का राखिएका जग्गा फुकुवाका लागि सङ्घीय सरकारसँग सिफारिश गर्ने निर्णय गरेको हो ।
प्रदेश राजधानी घोषणाअघि २०७७ साल असोज १६ गते सरकारले ती क्षेत्रका जग्गा रोक्का गर्ने निर्णय गरेको थियो ।
आजको निर्णयअनुसार—
- राप्ती गाउँपालिकाका सम्पूर्ण वडा र गढवा गाउँपालिका वडा नं. १, २ र ३ मा १ कट्ठाभन्दा सानो क्षेत्रफलमा कित्ताकाट गर्न पाइने छैन ।
- शीतगङ्गा नगरपालिका वडा नं. ८ र ९ मा भने १ रोपनीभन्दा सानो जग्गा कित्ताकाट गर्न रोक हुनेछ ।
- जग्गा खरिदकर्ताले एकीकरण आयोजनासम्बन्धी शर्तहरू पालना गर्ने गरी सहमतिपत्रमा हस्ताक्षर गर्नुपर्ने व्यवस्था गरिएको छ ।
यस निर्णयले लामो समयदेखि रोक्का कारण जग्गा खरिद–विक्रीमा समस्या भोग्दै आएका स्थानीयलाई केही सहज हुने अपेक्षा गरिएको छ ।
