धार्मिक सहिष्णुतामा खलल पुर्याउने व्यक्ति वा समूहलाई कडा कारबाही गरिने
काठमाडौं । सरकारले धार्मिक सहिष्णुतामा खलल पुर्याउने गतिविधिमा संलग्न व्यक्ति वा समूहलाई कानुनी दायरामा ल्याउने स्पष्ट संकेत गरेको छ। गृह मन्त्रालयमा बसेको केन्द्रीय सुरक्षा समितिको बैठकले स्थानीय प्रशासन, प्रदेश र पालिकाबीच समन्वय बढाएर अवस्था बिग्रन नदिने निर्णय गरेको हो।
बैठकमा विभिन्न धार्मिक समुदाय लक्षित भ्रामक र आपत्तिजनक सामाजिक सञ्जाल गतिविधिबारे छलफल भएको गृह मन्त्रालयका प्रवक्ता आनन्द कोइरालाले जानकारी दिए। धार्मिक गतिविधिबारे थप छलफल गर्न आज मानवअधिकार आयोग, अन्य संवैधानिक निकाय र सुरक्षा निकायसहितको बैठक बस्ने निर्णयसमेत गरिएको छ।
यसैगरी, निर्वाचन सुरक्षाका लागि सुरक्षा निकायले गरेका तयारी र आवश्यक समन्वयबारे समीक्षा गरिएको छ। साथै, नवयुवा आन्दोलनपछि फरार रहेका कैदीबन्दी पक्राउ अभियानलाई तीव्र बनाउने विषयमा पनि सुरक्षा निकायलाई थप सक्रिय बनाउने निर्णय गरिएको मन्त्रालयले जनाएको छ।
