आज तापक्रम यसवर्ष कै कम, हुस्सुले दैनिक जनजीवन प्रभावित
काठमाडौं । हिउँद याम सुरु भएयताकै सबैभन्दा कम न्यूनतम तापक्रम आज मापन भएको छ। जल तथा मौसम पूर्वानुमान महाशाखाका अनुसार देशकै सबैभन्दा चिसो स्थान जुम्ला बनेको छ, जहाँ तापक्रम माइनस ६ डिग्री सेल्सियसमा झरेको छ।
महाशाखाले जनाएअनुसार डडेलधुरा, दीपायल र सुर्खेतजस्ता पश्चिमी पहाडी क्षेत्रहरूमा पनि तापक्रम काठमाडौँभन्दा कम रहेको छ। त्यस्तै, जोमसोम र जिरीलगायतका हिमाली तथा उच्च पहाडी भेगमा तापक्रम शून्यभन्दा तल झरेको छ, जसले चिसो अझ कडा बनाएको छ।
हाल देशभर पश्चिमी वायुको आंशिक प्रभाव कायम रहेको मौसमविद्हरूको भनाइ छ। यसका कारण तराई र पहाडी भेगका धेरै स्थानमा बाक्लो हुस्सु र कुहिरो लागेको छ। विशेषगरी तराई क्षेत्रमा दिउँसोसम्म पनि कुहिरो कायम रहने सम्भावना रहेको महाशाखाले जनाएको छ।
मौसम पूर्वानुमानअनुसार कोशी, मधेश, बागमती, गण्डकी र लुम्बिनी प्रदेशमा आंशिक बदली रहनेछ भने बाँकी पहाडी तथा हिमाली क्षेत्रहरूमा प्रायः मौसम सफा रहने अपेक्षा गरिएको छ।
तराई भूभागमा हुस्सु र कुहिरोका कारण दैनिक जनजीवन, स्वास्थ्य, पर्यटन तथा हवाई र सडक यातायातमा आंशिक असर पर्न सक्ने भएकाले आवश्यक सतर्कता अपनाउन महाशाखाले आग्रह गरेको छ। तापक्रम लगातार घट्दै जाँदा देशभर चिसोको प्रभाव बढ्दै गएको छ, जसले सर्वसाधारणलाई थप सतर्क रहनुपर्ने अवस्था सिर्जना गरेको छ।
