लुम्बिनी र सुदूरपश्चिमका तराईमा तापक्रम अझ बढ्ने
देशभर वर्षाको गतिविधि कमजोर बन्दै गएसँगै तापक्रम बढ्न थालेको छ । केही स्थानमा हल्कादेखि मध्यम वर्षा भए पनि अधिकांश भूभागमा पानी नपरेकाले गर्मीको अनुभूति बढेको हो । मौसम पूर्वानुमान महाशाखाले अबका दिनमा क्रमशः तापक्रम अझ बढ्ने संकेत गरेको छ ।
महाशाखाका अनुसार हाल देशमा स्थानीय वायु तथा पश्चिमी वायुको सामान्य प्रभाव कायम रहे पनि वर्षा गराउने प्रणाली कमजोर बनेको छ । त्यसैले आज र भोलि देशका केही सीमित स्थानमा मात्रै वर्षा हुने सम्भावना रहेको छ भने अधिकांश क्षेत्रमा मौसम आंशिकदेखि सामान्य बदली रही गर्मी बढ्ने अवस्था देखिएको छ ।
आज दिउँसो विशेषगरी कोशी प्रदेशका हिमाली तथा पहाडी भूभागका केही स्थानमा हल्कादेखि मध्यम वर्षाको सम्भावना रहेको छ । बागमती र गण्डकी प्रदेशका उच्च पहाडी तथा हिमाली क्षेत्रमा पनि केही स्थानमा वर्षासँगै हिमपात हुन सक्ने अनुमान गरिएको छ । साथै मधेश, कोशी, बागमती र गण्डकी प्रदेशका तराई क्षेत्र तथा अन्य पहाडी भूभागका एक–दुई स्थानमा मेघगर्जन र चट्याङसहित हल्का वर्षा हुन सक्ने महाशाखाले जनाएको छ ।
यद्यपि वर्षाको सम्भावना सीमित क्षेत्रमा मात्रै रहेकाले देशका अधिकांश स्थानमा गर्मी बढ्ने देखिएको छ । विशेषगरी सुदूरपश्चिम र लुम्बिनी प्रदेशका तराई भूभागमा तापक्रम उल्लेख्य रूपमा बढ्न सक्ने चेतावनी मौसमविद्हरूले दिएका छन् । अत्यधिक गर्मीका कारण दिउँसोको समयमा बाहिर निस्कँदा सावधानी अपनाउन, पर्याप्त पानी पिउन र लामो समय घाममा नबस्न सर्वसाधारणलाई सुझाव दिइएको छ ।
महाशाखाले भोलिका लागि पनि समान खालको मौसमको पूर्वानुमान गरेको छ । केही पहाडी तथा हिमाली क्षेत्रमा हल्का वर्षा भए पनि सुदूरपश्चिम र लुम्बिनीका तराई जिल्लामा गर्मी अझ बढ्ने सम्भावना रहेको जनाइएको छ । मौसमविद्हरूका अनुसार मनसुन भित्रिन अझ केही समय बाँकी रहेकाले आगामी दिनमा तराई क्षेत्रमा तातो हावा र गर्मीको प्रभाव क्रमशः बढ्न सक्नेछ ।
