बुटवलमा अवैध रूपमा सञ्चालित ८ मेडिकल क्लिनिक र ल्याब बन्द
रुपन्देही, बुटवल – मानिसको स्वास्थ्यसँग प्रत्यक्ष सम्बन्ध राख्ने सेवा क्षेत्रमा गम्भीर लापरबाही देखिएपछि बुटवलको मुख्य बजारमा सञ्चालित ८ वटा मेडिकल क्लिनिक र ल्याबहरूलाई सम्बन्धित निकायले बिहीबार बन्द गराएको छ।
जिल्ला प्रशासन कार्यालय रुपन्देहीको नेतृत्वमा जिल्ला स्वास्थ्य कार्यालय, बुटवल उपमहानगरपालिका, बुटवल उद्योग वाणिज्य संघ, नेपाल पत्रकार महासंघ रुपन्देही शाखा तथा उपभोक्ता हित संरक्षण मञ्चसहितको टोलीले संयुक्त रूपमा बजार क्षेत्रका ११ वटा मेडिकल, क्लिनिक र ल्याबहरूको अनुगमन गर्दा तीमध्ये ८ वटा दर्ताविना नै वर्षौँदेखि सञ्चालनमा रहेको पाइएपछि तत्काल बन्द गरिएको हो।
सहायक प्रमुख जिल्ला अधिकारी चिरन्जीवी रानाका अनुसार, जनगुनासो बढेपछि अनुगमन थालिएको हो। “स्वास्थ्य क्षेत्रमा गैरकानुनी गतिविधि रोक्न अनुगमन गरिएको हो। दर्ता नभएका क्लिनिकहरू बन्द गरिएको छ,” रानाले बताए।
बन्द गरिएका क्लिनिकहरूमा:
- शिला मेडिकल हल
- वरदान क्लिनिक
- चन्दन फार्मेसीद्वारा सञ्चालित ल्याब
- पुनम मेडिकल हल
- मङ्गलमय स्वास्थ्य क्लिनिक
- रुचिका हेल्थ क्लिनिक
- बुटवल डेन्टल प्रा.लि.
लगायत रहेका छन्।
सहायक प्रमुख जिल्ला अधिकारी रानाले दर्ता प्रमाणपत्र बिना अब कुनै पनि स्वास्थ्य सेवा सञ्चालन गर्न नदिने स्पष्ट पारे। बन्द गरिएका क्लिनिकका सञ्चालकहरूलाई दर्ता प्रक्रिया पूरा गरेपछि मात्र पुनः सञ्चालनको अनुमति दिइने जनाइएको छ।
स्थानीय बासिन्दाले बुटवलमा अझै पनि अनुगमन हुन बाँकी धेरै मेडिकल र ल्याबहरू रहेको भन्दै थप छानबिनको माग गरेका छन्।
यस घटनाले जनस्वास्थ्यप्रति देखिएको बेवास्ता उजागर गरेको छ भने जिम्मेवार निकायलाई अझ सक्रिय हुन प्रेरित पनि बनाएको छ।
