भूमिहीन, सुकुम्बासी, अव्यवस्थित बसोबासीको जग्गा नक्साङ्कनको कार्य सुरु
तुलसीपुर उपमहानगरपालिकाले भूमिहीन, सुकुम्बासी र अव्यवस्थित बसोबासीका लागि जग्गा नापजाँच प्रक्रिया पुनः सुरु गरेको छ। राष्ट्रिय भूमि आयोग दाङको समन्वयमा बिहीबारदेखि वडा नम्बर ६ बाट कार्य सुरु गरिएको हो, जुन आयोग विघटनपछि रोकिएको थियो।
भूमि शाखाका अमिन रितेश बस्नेतका अनुसार वडा नम्बर ६ मा अहिलेसम्म ७५ प्रतिशत काम सम्पन्न भइसकेको छ। एक हजार दुई सय ६५ कित्ताको पाँच लाख ३४ हजार वर्ग मिटरभन्दा बढी क्षेत्रफल नापिएको छ।
राष्ट्रिय भूमि आयोग दाङका अध्यक्ष हुकुम बस्नेतले भूमिहीन दलित र सुकुम्बासीलाई केन्द्रमा राखेर कार्य अघि बढाइएको र एक महिनाभित्र नापजाँच पूरा गरेर दुई महिनाभित्र लालपूर्जा वितरण गरिने बताएका छन्। यद्यपि बबई, राप्ती, शान्तिनगर लगायत क्षेत्रका जङ्गलभित्रको जग्गा नाप्न कठिनाइ भइरहेको छ।
उपमहानगर प्रमुख टिकाराम खड्काले २३ हजारभन्दा बढी निवेदन दर्ता भइसकेको जानकारी दिँदै, भूमिहीन दलितलाई प्राथमिकतामा राखेर लालपूर्जा वितरण गरिने बताए। स्थानीय क्वाङ्गी विश्वकर्माले चार दशकदेखि उपभोग गर्दै आएको जग्गाको लालपूर्जा पाउने आशा व्यक्त गरेका छन्।
