लुम्बिनी: भारतीय विद्यार्थीको चिनियाँ भाषा परीक्षा गन्तव्य
चिनियाँ भाषा सिक्ने र त्यसको परीक्षा दिने भारतीय विद्यार्थीहरूको संख्या पछिल्लो समय उल्लेखनीय रूपमा बढेको छ। अध्ययन र रोजगारीका अवसर खोज्ने क्रममा चिनियाँ भाषा दक्षता प्रमाणित गर्नुपर्ने आवश्यकता बढेकाले नेपालका परीक्षा केन्द्रहरू भारतीय विद्यार्थीहरूको प्रमुख गन्तव्य बनेका छन्।
भारतमा सीमित संख्यामा मात्र चिनियाँ भाषा परीक्षा केन्द्रहरू उपलब्ध छन्। ती केन्द्रहरूमा समयमै परीक्षा दिन कठिनाइ हुने र एक वर्षसम्म कुर्नुपर्ने अवस्थाले भारतीय विद्यार्थीहरूलाई नेपालमा परीक्षा दिन प्रेरित गरेको छ।
लुम्बिनी बौद्ध विश्वविद्यालयअन्तर्गत सिटी क्याम्पस, देवदह, नेपालमा सन् २०२४ अप्रिलदेखि चिनियाँ भाषा परीक्षा (एचएसके टेस्ट) सञ्चालन हुँदै आएको छ। यो नेपालमा चीन सरकारको शिक्षा मन्त्रालयबाट मान्यता प्राप्त चारवटा केन्द्रहरूमध्ये उपत्यका बाहिरको एक मात्र केन्द्र हो।
परीक्षा दिन आउने ५० प्रतिशतभन्दा बढी विद्यार्थीहरू भारतीय हुन्। लामो दूरीको यात्रा र समयको चुनौती भए पनि सहज परीक्षा प्रक्रियाका लागि उनीहरू नेपाल आउने गरेका छन्। भारतमै रहेका चिनियाँ लगानीका उद्योगमा पनि भाषा दक्षता आवश्यक हुने भएकाले लुम्बिनीको यो परीक्षा केन्द्र व्यस्त हुने गरेको छ।
चिनियाँ भाषामा दक्षता प्राप्त गरेपछि भारतीय विद्यार्थीहरूले उद्योग, व्यापार, र उच्च शिक्षाका अवसरहरूमा प्रवेश गर्ने सम्भावना बढ्ने अपेक्षा राखेका छन्। लुम्बिनी बौद्ध विश्वविद्यालयले दिएको यो सुविधा सीमित समयमै अन्तर्राष्ट्रिय रूपमा महत्त्वपूर्ण परीक्षा केन्द्रका रूपमा स्थापित हुँदै गएको छ।
