उपसभामुख रुबी ठाकुरको प्रस्तुतिमाथि वरिष्ठ पत्रकार यादवको प्रश्न : ‘भावनाले होइन, क्षमताले काम गर्नुपर्छ’
न्यूज कारखाना
रौतहट, असोज १७
मधेसको प्रतिनिधित्व गर्दै उपसभामुखको जिम्मेवारीमा पुगेकी रुबी ठाकुरको सार्वजनिक प्रस्तुतिमाथि वरिष्ठ पत्रकार सुरेश यादवले प्रश्न उठाएका छन्।
यादवले सामाजिक सञ्जाल फेसबुकमार्फत उपसभामुख ठाकुरको क्षमता र प्रस्तुतिलाई लिएर असन्तुष्टि व्यक्त गर्दै जिम्मेवारीअनुसार आफ्नो क्षमता सुधार गर्नुपर्ने बताएका छन्। ‘जहाँ क्षमताको कुरा हुन्छ, त्यहाँ भावनाले काम चल्दैन’ भन्दै यादवले उपसभामुख ठाकुरले आफ्नो क्षमता अपेक्षाअनुसार प्रस्तुत गर्न नसकेको टिप्पणी गरेका छन्। उनले हेरेर पनि पढ्न नसक्नु कमजोरी भएको उल्लेख गर्दै यस्ता विषयलाई मधेसी पहिचान वा भावनाको आवरणमा ढाकछोप गर्न नहुने धारणा राखेका छन्।
यादवको टिप्पणीमा प्रतिनिधित्व र कार्यक्षमताबीचको अन्तरलाई मुख्य विषय बनाइएको देखिन्छ। कुनै समुदाय वा क्षेत्रबाट प्रतिनिधित्व हुनु महत्वपूर्ण भए पनि सार्वजनिक पदमा पुगेपछि सम्बन्धित व्यक्तिको प्रस्तुति, अध्ययन, अभिव्यक्ति र जिम्मेवारी निर्वाह गर्ने क्षमतालाई पनि समान रूपमा हेर्नुपर्ने उनको तर्क छ।
ठाकुर उपसभामुख नियुक्त भएपछि आफूले पनि उनको प्रशंसा गरेको यादवले स्मरण गरेका छन्। उनले भारतको बिहारकी मिथिला ठाकुरसँग तुलना गर्दै त्यतिबेला मधेसमा ठाकुरको चर्चा र प्रशंसा भएको बताएका छन्।
यादवका अनुसार ठाकुरको पारिवारिक पृष्ठभूमि, उनका आमाबुबाले गरेको संघर्ष र मेहनतलाई समेत सञ्चारमाध्यमले प्राथमिकताका साथ प्रस्तुत गरेका थिए। पत्रकारहरू ठाकुरको घर तथा खेतबारीसम्म पुगेर उनको संघर्ष र सफलताको कथा सार्वजनिक गरेको उनले उल्लेख गरेका छन्। तर, अहिले उपसभामुखका रूपमा ठाकुरको प्रस्तुतिले आफूले अपेक्षा गरेको स्तर कायम गर्न नसकेको यादवको गुनासो छ।
उनको यो टिप्पणीले मधेसको भावनात्मक प्रतिनिधित्व मात्रै पर्याप्त हुन्छ कि सार्वजनिक जिम्मेवारीसँगै क्षमता र प्रस्तुतिको स्तर पनि मापन हुनुपर्छ? भन्ने बहसलाई सतहमा ल्याएको छ।
यद्यपि, यादवले सामाजिक सञ्जालमा उठाएका विषय उनका व्यक्तिगत धारणा हुन्। उपसभामुख ठाकुरको तर्फबाट यस विषयमा कुनै प्रतिक्रिया सार्वजनिक भएको विवरण भने उक्त पोस्टमा उल्लेख छैन।
