अत्याधिक गर्मीले पश्चिम तराई प्रभावित
पश्चिम तराईमा अत्याधिक गर्मीका कारण जनजीवन प्रभावित बन्न थालेको छ।सर्वसाधारणको जनजीवन प्रभावित बन्दै गएको छ भने अस्पतालहरूमा गर्मीजन्य समस्या लिएर उपचारका लागि आउने बिरामीको संख्या बढ्न थालेको छ।
चर्को घाम र तातो हावाले सडक, बजार र श्रम क्षेत्रमा प्रत्यक्ष असर पारिरहेको छ।
सोमबार पश्चिम तराईका विभिन्न जिल्लामा उच्च तापक्रम मापन गरिएको छ।
ताैलिहवा, कोहलपुर, नेपालगन्ज, धनगढी र भैरहवासहितका क्षेत्रमा तापक्रम ४० डिग्री सेल्सियस नजिक पुगेपछि सर्वसाधारणदेखि श्रमिक वर्गसम्म समस्यामा परेका छन्। अस्पतालहरूमा डिहाइड्रेसन, रिङ्गटा लाग्ने, कमजोरी र झाडापखालाका बिरामी बढ्न थालेका छन्।
चर्को गर्मीका कारण बाँकेको कोहलपुरस्थित इलाका प्रहरी कार्यालयले हिरासतमा रहेका बन्दीका लागि पहिलोपटक एसी जडान गरेको छ। चिकित्सकहरूले दिउँसोको घाममा बाहिर ननिस्कन, प्रशस्त पानी पिउन र बालबालिका तथा वृद्धवृद्धाको विशेष हेरचाह गर्न आग्रह गरेका छन्। मौसमविद्ले मंगलबार पनि लुम्बिनी र सुदूरपश्चिमका तराई क्षेत्रमा तातो दिन रहने सम्भावना रहेको बताएका छन्।
