५ औं नगर स्तरीय राष्ट्रपति रनिङ सिल्ड प्रतियोगिता शुरु स्टेडियम बनाउन पहल गर्ने प्रदेश सदस्य पाण्डेको उदघोष

एस एम न्युज , तौलिहवा
“स्वास्थयका लागी खेलकुद , राष्ट्रका लागि खेलकुद , अनुशासनका लागी खेलकुद , पहिचानका लागी खेलकुद ” भन्ने मुल नाराका साथ ५ औं नगर स्तरीय राष्ट्रपति रनिङ सिल्ड प्रतियोगिता शुरु भएको छ । कपिलवस्तु नगरपालिकाको आयोजनामा पुस ५ देखी पुस ८ सम्म प्रतियोगिता चल्ने छ ।

तौलिहवा स्थित बुद्धपद्म माबिको खेल मैदानमा आज मध्याह्न बिशेष कार्यक्रम बिच प्रतियोगिताको उदघाटन गरिएको छ । उदघाटन कार्यक्रममा बोल्दै प्रमुख अतिथि कपिलवस्तु २ को २ का प्रदेश सभा सदस्य शुधाकर पाण्डेले खेलकुद सबैका लागी महत्त्वपूर्ण भएपनि जिल्लामा एउटा राम्रो खेल मैदान र स्टेडियम नहुनु दु:खद कुरा रहेको बताउनुभयो । उहाँले जिल्ला भित्र उपयुक्त ठाउँको छनौट गरि स्टेडियम बनाउन प्रदेशमा पहल गर्ने समेत बताउनु भएको छ ।

तौलिहवा स्थित बुद्धपद्म माबिको खेल मैदानमा झाकि र विभिन्न नाचगान सहित प्रतियोगिताको उदघाटन भएको छ ।
नगरस्तरिय राष्ट्रपति रनिङ शिल्ड प्रतियोगितामा भलिवल र एथलेटिक्स खेल मात्र हुने भएको छ । गत बर्ष कबड्डि खेलमा घटना हुँदा यसपटक कबड्डि नहुने समेत भएको छ । प्रतियोगितामा एथलेटिक्स तर्फ २३ वटा बिधालय र भलिबल तर्फ १४ छात्र र ७ वटा छात्राको टिम सहभागी भएका छन् ।
प्रतियोगितामा बिजेताका लागी पुरस्करमा खेलमा प्रथम हुनेलाई नगद २० हजार सहित सिल्ड र प्रमाण पत्र, द्धितियलाई नगद १२ हजार र प्रमाण पत्र र तृतिय हुनेलाई नगद ८ हजार र प्रमाण पत्रको ब्यवस्था संगै २३ स्वर्ण पदक , २३ रजत , २३ कास्य पदक समेत रहेका छन् ।

कार्यक्रममा कपिलबस्तु नगरपालिकाका प्रमुख प्रशासकिय अधिकृत शेषकान्त पौडेल, शिक्षा शाखा प्रमुख हरि प्रसाद ज्ञावाली, शिक्षा तथा समन्वय इकाईका प्रमुख थानेश्वर घिमिरे , कपिलबस्तु नगरपालिका वडा नं. १ का वडाध्यक्ष मो जाहिद खाँ , वडा नं. ३ का वडाध्यक्ष प्रकाश गैरे, वडा नं. ४ का वडाध्यक्ष रविन्द्र तिवारी, वडा नं. ६ का वडाध्यक्ष रामजित कुर्मी, वडा नं. १० का वडाध्यक्ष मोहन लाल शर्मा, वडा नं. ११ का वडाध्यक्ष राम गोपाल यादव, जिल्ला खेलकुद विकास समितिका अध्यक्ष राजेश उपाध्यय लगायत विभिन्न विद्यालयका प्रधानध्यापक , शिक्षक लगायतको र पालिकाका कर्मचारीहरुको सहभागिता रहेको थियो ।

उक्त उदघाटन कार्यक्रम कपिलबस्तु नगरपालिकाका सामाजिक विकासका संयोजक दिरेप चौधरीको अध्यक्षतामा सम्पन्न भएको थियो भने कार्यक्रमको संचालन युवराज भुषालले गर्नु भएको थियो।