भैरहवाकाे अन्तर्राष्ट्रिय विमानस्थलमा पुनः उडान ठप्प, सेवाग्राही मर्कामा
भैरहवा – लामो समयदेखि अन्तर्राष्ट्रिय उडानका लागि संघर्षरत गौतम बुद्ध अन्तर्राष्ट्रिय विमानस्थल (GBIA) फेरि सुनसान बन्न पुगेको छ। १ अप्रिलबाट सुरु हुने समर सिजनका लागि कुनै पनि अन्तर्राष्ट्रिय वायुसेवा कम्पनीले उडान तालिका पेस नगरेपछि भैरहवाबाट हुने अन्तर्राष्ट्रिय उडान अनिश्चितकालका लागि रोकिएको हो।
गत वर्षसम्म नियमित उडान गरिरहेका जजिरा एयरवेज, थाई एयर एसिया र फ्लाई दुबईले समेत भैरहवा उडान बन्द गरेका छन्। यी तीन वायुसेवा कम्पनीले मार्च ३० देखि आफ्ना उडान हटाएपछि विमानस्थल पुनः सञ्चालनविहीन बनेको छ।
उडान रोकिएपछि यात्रुहरू अन्योलमा
अन्तर्राष्ट्रिय उडान रोकिएपछि भैरहवाबाट विदेश जान चाहने यात्रुहरू मारमा परेका छन्। नेपाल वायुसेवा निगम (नेपाल एयरलाइन्स) ले काठमाडौं–भैरहवा–दुबई मार्गमा उडान गरे पनि विमानस्थलमा केवल ‘टच डाउन’ मात्र गर्ने गरेको छ। निगमको जहाज भैरहवामा अवतरण गरे पनि यात्रु चढ्ने र झार्ने प्रक्रिया नै नहुँदा अन्तर्राष्ट्रिय यात्रुहरूलाई कुनै फाइदा पुगेको छैन।
कतार एयरवेजको पछि अन्य वायुसेवाको बहिर्गमन
कतार एयरवेजले केही समय उडान गरेपछि गत पुसमै आफ्नो सेवा बन्द गरिसकेको थियो। अब जजिरा एयरवेज, फ्लाई दुबई, र थाई एयर एसियाले समेत भैरहवाबाट उडान स्थगित गरेपछि अन्तर्राष्ट्रिय टर्मिनल सुनसान बनेको छ।
विमानस्थल प्रशासनको प्रयास
गौतम बुद्ध अन्तर्राष्ट्रिय विमानस्थलका महाप्रबन्धक प्रताप तिवारीका अनुसार वायुसेवा कम्पनीहरूलाई पुनः उडान गर्न अनुरोध गर्दै छलफल जारी छ। “हामी वायुसेवा कम्पनीहरूसँग निरन्तर सम्पर्कमा छौँ। उडान पुनः सञ्चालनका लागि प्रयास गरिरहेका छौँ,” उनले भने। तर हाललाई कुनै वायुसेवा कम्पनीले भैरहवाबाट उडान पुनः सुरु गर्ने ठोस निर्णय गरिसकेका छैनन्।
भविष्यप्रति अन्योल
नेपाल सरकारको ठूलो लगानीमा निर्माण गरिएको यो विमानस्थल अन्तर्राष्ट्रिय उडानको अभावमा निष्क्रिय बन्ने हो कि भन्ने चिन्ता बढेको छ। पर्यटन व्यवसायीहरूका अनुसार भैरहवा विमानस्थल सञ्चालनमा नआउँदा लुम्बिनी क्षेत्रमा पर्यटक आगमनमा असर पर्नेछ। स्थानीय व्यवसायीहरूले विमानस्थल नियमित सञ्चालन गर्नका लागि सरकारले थप पहल गर्नुपर्ने माग गरेका छन्।
अब भैरहवा विमानस्थल पुनः व्यस्त बन्ने हो वा लामो समयसम्म सुनसान रहने हो भन्ने अन्योल कायमै छ। सरकारले अन्तर्राष्ट्रिय वायुसेवाहरूलाई आकर्षित गर्न विशेष नीति नबनाएमा यो विमानस्थलको भविष्य संकटमा पर्ने देखिन्छ।
