कपिलवस्तुमा २२औं राष्ट्रिय धान दिवस उत्साहपूर्वक मनाइयो
लुम्बिनी प्रदेशको सबैभन्दा बढी धान उत्पादन हुने जिल्ला कपिलवस्तुमा २२औं राष्ट्रिय धान दिवसका अवसरमा विभिन्न स्थानमा रोपाई महोत्सव गरिएको छ। ‘धान बालीमा सघनताः खाद्य सुरक्षा र आत्मनिर्भरता’ भन्ने नारासहित कृषि ज्ञान केन्द्र, धान सुपर जोन कपिलवस्तु, विभिन्न नगरपालिका र गाउँपालिकाले संयुक्त रूपमा कार्यक्रम आयोजना गरेका हुन्।
जिल्लाको मनोहरापुरमा आयोजित मुख्य कार्यक्रममा जिल्ला समन्वय समिति प्रमुख बाबुराम आचार्यले श्रम विदेशिने, मल र सिँचाइको अभावले अन्न उत्पादनमा गिरावट आएको भन्दै चिन्ता व्यक्त गरे। कृषि ज्ञान केन्द्र प्रमुख भास्कर पौडेलले परम्परागत खेती परित्याग गरी आधुनिक प्रविधि र यन्त्रको प्रयोगमा जोड दिँदै धान खेतीलाई अझ उचाइमा लैजानुपर्ने बताए।
हालसम्म जिल्लामा ९ प्रतिशत रोपाई सम्पन्न भएको जानकारी दिँदै कृषकहरूले मल, सिँचाइ, र बीउको चरम अभाव रहेको गुनासो गरे। प्रति हेक्टर ४ मेट्रिक टन उत्पादन हुने अनुमानसहित कपिलवस्तुमा करिब ६५ हजार ८८१ हेक्टर क्षेत्रफलमा धान खेती हुने कृषि ज्ञान केन्द्रको तथ्यांक छ।
बुद्धभुमी नगरपालिका, कपिलवस्तु नगरपालिका, मायादेवी र यशोधरा गाउँपालिकाले आ-आफ्ना वडामा सांस्कृतिक कार्यक्रमसहित रोपाई महोत्सव मनाएका थिए। रोपाईसँगै कृषकहरूलाई दही-चिउरा खुवाइ स्वागत गरिएको थियो। कृषकहरूले भने समयमै बीउ, मल र सिँचाइ सुविधा नपाउँदा चिन्ता व्यक्त गरेका छन्।
